VOLUNTARIADO INTERNACIONAL

Friulio

  FRIOL (LUGO)

No concello lucense de Friol vense desenvolvendo dende o ano 2017 o Festival Friulio, no que se recrea a vida dun poboado castrexo e a chegada dun destacamento romano, dando a coñecer un proceso histórico chave como foi a romanización do territorio no século II d.C. e os cambios que isto supuxo a nivel de sociedade, cultura, arquitectura… 

O Friulio é organizado cada primavera pola asociación A Castronela, na que centos de veciños e veciñas conviven e aproveitan os seus espazos de lecer para  construir un poboado castrexo da época da romanización á beira do río Narla, así como recrear as vestimentas da época, as ferramentas ou os fogares, cós seus fornos, pendellos…

No Friulio participan asociacións de recreación histórica, a meirande parte das que integran Arde Lucus así como moitas outras doutros lugares da península. 

Esta actividade proponse poñer en valor e axudar a desenvolver unha actividade senlleira que nos achega ao noso pasado, axudando ás persoas voluntarias da Castronela en accións de restauración e consolidación no Castro Friulio, sinalización dos accesos a través do paseo fluvial, retirada de especies invasoras e plantación de autóctonas nas inmediacións ao castro… 

Tarefas do voluntariado 

Para este 2023 plantéxase tamén participar na organización e execución da II Mala no Castro Friulio, un evento que tivo lugar por vez primeira o ano pasado, coincidindo coa primeira edición deste Campo de Voluntariado, no que se trata de recuperar a tradición da malla do trigo, que era moito máis que a criba dos cereais: un proceso de unha semana no que todas as persoas dunha aldea tiñan un papel: colleitábase, mallábase no millo, recollíase o gran, e aproveitaban a palla resultante (neste caso para renovación das cubertas das pallozas do Castro Friulio). Todo isto envolto nunha gran festa, pois eran poucas as ocasións nas que todo o pobo estaba xunto para un mesmo cometido.

Obxectivos

1. Traballar na mellora e posta en valor do Castro Friulio (Friol), e axudar na restauración e consolidación de diversas estruturas (tellados vexetais das pallozas, fornos…)
   
   
2.  Participar na plantación de bosque de árbores autóctonas e froiteiras ao longo do paseo fluvial do río Narla ata o poboado.
   
   
3. Participar na organización e execución da II Malla no Castro Friulio, evento que trata de recuperar a tradición da malla do trigo, que era moito máis que a criba dos cereais: un proceso de unha semana no que todas as persoas dunha aldea tiñan un papel: colleitábase, mallábase no millo, recollíase o gran, e aproveitaban a palla resultante (neste caso para renovación das cubertas das pallozas do Castro Friulio).
   
   
4. Creación de pequena peza audiovisual sobre a malla da Castronela para divulgación en redes sociais e do Concello.

Obradoiros e actividades complementarias

Obradoiros

• Cestería
  
  
• Obradoiro de Pan e Queixo no poboado castrexo
  
  
• Construción dunha palloza
  
  
• Foto Rally
  
  
• Percusión doméstica: música e baile tradicional

Saídas

• Fortaleza de Narla (Friol)
  
  
•  Lugo: muralla romana, catedral e Domus do Mitreo
  
  
• Sobrado dos Monxes: mosteiro, lagoa e ruta da Carballeira e Campamento Romano de A Ciadella
  
  
• Ribadeo e Praia de As Catedrais
  
  
• Granxa Ecolóxica